കൊച്ചി
ഫെഡറല്‍ ബാങ്കിന്റെ സാമൂഹ്യ പ്രതിബദ്ധതാ പദ്ധതികളുടെ ഭാഗമായിസ്‌ക്കൂളുകളില്‍ കംപ്യൂട്ടര്‍ ലാബുകള്‍ സ്ഥാപിക്കാന്‍ സഹായം നല്‍കും
ഫെഡറല്‍ ബാങ്കിന്റെ സാമൂഹ്യ പ്രതിബദ്ധതാ പദ്ധതികളുടെ ഭാഗമായി സ്‌ക്കൂളുകളില്‍ കംപ്യൂട്ടര്‍ ലാബുകള്‍ സ്ഥാപിക്കുന്ന പുതിയ സംരംഭത്തിന്‌ തുടക്കമിട്ടു. തുടക്കത്തില്‍ കേരളത്തില്‍ ആരംഭിക്കുന്ന ഈ പദ്ധതി രാജ്യത്തിന്റെ മറ്റു ഭാഗങ്ങളിലേക്കും വ്യാപിപ്പിച്ച്‌ വരും വര്‍ഷങ്ങളില്‍ ഒരു മെഗാ പദ്ധതിയായി മാറ്റുകയാണ്‌ ലക്ഷ്യം.
അഞ്ചു പ്രീ ഓണ്‍ഡ്‌ കംപ്യൂട്ടറുകളും അവ സ്ഥാപിക്കാനുള്ള ചെലവും ഒരു വര്‍ഷത്തേക്കുള്ള വാര്‍ഷിക സംരക്ഷണ കരാറിന്റെ ചെലവും ഇതിന്‍ കീഴില്‍ ഫെഡറല്‍ ബാങ്ക്‌ ലഭ്യമാക്കും. ഓരോ കംപ്യൂട്ടറിനും 4500 രൂപ വീതമെന്ന നിലയില്‍ ആകെ 22,500 രൂപയാവും ഓരോ സ്‌ക്കൂളിനും വേണ്ടി ബാങ്ക്‌ വകയിരുത്തുക. ഈ വര്‍ഷം ഏപ്രില്‍ ഒന്നിന്‌ ആരംഭിച്ചു കഴിഞ്ഞ ഈ പദ്ധതിയുടെ ഭാഗമായി ഈ വര്‍ഷം 200 സ്‌ക്കൂളുകളിലായി ആയിരത്തോളം കംപ്യൂട്ടറുകള്‍ സ്ഥാപിക്കാനാണു ബാങ്ക്‌ ഉദ്ദേശിക്കുന്നത്‌. നിലവില്‍ കേരളത്തിലാണ്‌ ഈ പദ്ധതി നടപ്പാക്കുന്നത്‌. രാജ്യത്തിന്റെ മറ്റു ഭാഗങ്ങളിലേക്കും ഇതു പിന്നീടു വ്യാപിപ്പിക്കും.
ഗ്രാമീണ മേഖലകളിലായുള്ള ആയിരക്കണക്കിനു സ്‌ക്കൂളുകളിലും ലക്ഷക്കണക്കിനു വിദ്യാര്‍ത്ഥികളിലും എത്തിച്ചേരാനാവുമെന്നാണു ബാങ്കു പ്രതീക്ഷിക്കുന്നത്‌. രാജ്യത്തിന്റെ പിന്നോക്ക മേഖലകളിലുള്ള ലക്ഷക്കണക്കിനു പാവപ്പെട്ട വിദ്യാര്‍ത്ഥികളുടെ ഭാവി മാറ്റിയെഴുതാന്‍ ബാങ്കിനാവുമെന്നാണു കരുതുന്നതെന്ന്‌ ബാങ്കിന്റെ ഹൂമന്‍ റിസോഴ്‌സസ്‌ വിഭാഗം മേധാവിയും ജനറല്‍ മാനേജറുമായ തമ്പി കുര്യന്‍ ചൂണ്ടിക്കാട്ടി.
ബാങ്കിന്റെ സാമൂഹ്യ പ്രതിബദ്ധത പദ്ധതികളുടെ ഭാഗമായി പാലിയേറ്റീവ്‌ കെയര്‍ യൂണിറ്റുകള്‍ ,ആംബുലന്‍സുകള്‍ സംഭാവന നല്‍കല്‍ ,സര്‍ക്കാര്‍ ആശുപത്രികളില്‍ മെഡിക്കല്‍ വാര്‍ഡുകള്‍ സ്ഥാപിക്കല്‍തുടങ്ങിയവയെല്ലാം ഇതിന്റെ ഭാഗമായി നടത്തി വരുന്നുണ്ട്‌. ഒരു കോടി രൂപയാണ്‌ ഈ വര്‍ഷം സാമൂഹ്യ പ്രതിബദ്ധത പദ്ധതികളുടെ ഭാഗമായി മാറ്റിവെച്ചിരിക്കുന്നത്‌.
ഹോര്‍മിസ്‌ മെമ്മോറില്‍ ട്രസ്റ്റ്‌ വഴി പ്രൊഫണല്‍ ഡിഗ്രി വിദ്യാര്‍ത്ഥികള്‍ക്ക്‌ സ്‌കോളര്‍ഷിപ്പുകള്‍ നല്‍കുന്നു. കൂടാതെ വിദ്യാര്‍ത്ഥികളില്‍ ബാങ്കിംഗ്‌ അവബോധം വളര്‍ത്താന്‍ ലക്‌ചറുകളും ഡിബേറ്റുകളും നടത്തിവരുന്നു.
കൊച്ചി ഫെഡറല്‍ ടവറില്‍ ഇന്നലെ നടന്ന ചടങ്ങില്‍ വിവിധ സ്‌കൂളുകളുടെ പ്രതിനിധികള്‍, ജനസേവ ശിശുഭവന്‍ പ്രസിഡന്റ്‌ ജോസ്‌ മാവേലി എന്നിവര്‍ക്ക്‌ തമ്പികുര്യന്‍, ബാങ്കിന്റെ സീനിയര്‍ ഓഫീഷ്യല്‍ രാജു ഹോര്‍മിസ്‌ എന്നിവര്‍ കംപ്യൂട്ടര്‍ ലാബുകളുടെ നിര്‍മ്മാണത്തിനും മറ്റുമായുള്ള തുക കൈമാറി.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ